రష్యా రాజధానిపై ఉక్రెయిన్ దాడి.. మాస్కో ఇంటర్నేషనల్ ఎయిర్ పోర్ట్ మూసివేత

రష్యాకు ఉక్రెయిన్ మరోసారి షాకిచ్చింది. ఆ దేశ రాజధాని మాస్కోపై ఈ ఉదయం డ్రోన్లతో దాడి చేసింది. మూడు డ్రోన్లతో అటాక్ చేసింది. ఒక డ్రోన్ మాస్కో శివార్లలో పడింది. మరో రెండు డ్రోన్లను రష్యా సైన్యం కూల్చి వేసింది. అయితే కూల్చివేసిన ఈ డ్రోన్లు భవనాలపై పడ్డాయి. డ్రోన్ల వల్ల రెండు భవనాలు దెబ్బతిన్నాయి. ఈ దాడుల నేపథ్యలో మాస్కో ఇంటర్నేషనల్ ఎయిర్ పోర్టును తాత్కాలికంగా మూసివేశారు. ఉక్రెయిన్ సరిహద్దుల నుంచి మాస్కో 500 కిలోమీటర్ల దూరంలో ఉంది. 

మరోవైపు ఈ దాడులను ఉగ్రదాడులుగా రష్యా రక్షణ శాఖ అభివర్ణించింది. మాస్కో నగరంపై మానవరహిత వాహనాలతో ఉక్రెయిన్ టెర్రరిస్టు దాడులకు పాల్పడిందని చెప్పింది. ఒక డ్రోన్ ను మాస్కో శివార్లలో ధ్వంసం చేశామని... మరో రెండు డ్రోన్లను ఎలక్ట్రానిక్ వార్ ఫేర్ సిస్టమ్ తో కూల్చి వేశామని, ఈ రెండు డ్రోన్లు నాన్ రెసిడెన్షియల్ బిల్డింగులపై పడ్డాయని తెలిపింది. 

ఈ దాడులపై రష్యా విదేశాంగ శాఖ స్పందిస్తూ... అమెరికా, దాని నాటో భాగస్వాముల సహకారం లేకుండా ఉక్రెయిన్ ఈ దాడులు చేయలేదని వ్యాఖ్యానించింది. ఈ సందర్భంగా మాస్కో సిటీ మేయర్ మాట్లాడుతూ... రెండు బిల్డింగులు స్వల్పంగా డ్యామేజ్ అయ్యాయని చెప్పారు. ఎవరికీ ఎలాంటి గాయాలు కాలేదని తెలిపారు.